??白话广州

 “返乡下咩？”“系啊，二月二吖嘛，要返去睇下！”路边，两位街坊见面倾计。唔讲唔知道，原来寻日系农历嘅二月二，即系俗称嘅“龙抬头”嘅日子。

 唔经唔觉，眨下眼正月已过去。二月二，喺包括广州在内嘅珠三角地区，都系“起龙船”嘅日子，西关泮塘等地嘅龙船，都会俾大家恭恭敬敬咁请上岸。呢个风俗同农耕文化有关，事关春季已经来临，农事开始，村民街坊都祈求龙起来兴风作雨，滋润大地，令大家一年都风调雨顺。有啲地方，仲会为细路仔举行开笔礼，祈求佢哋读书叻叻。除咗广州，珠三角其它地方亦有各自嘅特色风俗，譬如东莞东坑，呢日就会搞“卖身节”，互相喷水祝福，有啲似傣族嘅泼水节。

 类似嘅节目，都有一个相同嘅背景：万物复苏，耕作开始，要搞个热闹嘅仪式，祈求祝福之余，亦唤发精神，为一年嘅收成努力。比起北方，南方嘅春耕比较早，一般正月底二月初就插田、种菜、种瓜。广州有句俗语，“木棉花开透，筑基兼使牛。”就系讲如今乡下嘅情景。喺广州，木棉花确实已经开透，到处都火红，不过城市里边，好难睇到“筑基兼使牛”嘅忙碌。不过，透过起二月二“起龙船”嘅习俗，我哋多少可以领略一下嗰种生机勃勃、积极向上嘅春天气息。

??